Lieve besunder, Van wegen des Conincx, onses genedigen, lieven heeren, siin wy durch Jheronimum Cock, schilder, woenende tAntwerpen, angesocht worden hem to willen consenteren te moegen doen drucken zekere caerte des furstendoms Gelre ende der graeffschaps Zupthen, gemaeckt by Christiaen sGrooten, als ghy uuyst syne medegesante supplication breeder sult sien. Ende want, naedat die caerte voirges(teld), mit verwen al affgesett by den suppliant overgeleyt, oversien is geweest, men ons angebrocht heeft, datter schiint (sic) gebreck te syne in de affsettinghe derselver, siinde eenige plaetzen ende heerlickheyden, wesende van ’t landt van Gelre ende Zupthen, onder werven, daermit andere aenstootende landen affgeteyckent, siin getogen ; andere appendencien der voirs(eyde) landen gheenssins en hoerden, ende daerbenevens wesende ‘tzelve landt van Gelre ende Zutphen oick nyet mit eender gelycker verwen affgesett ende anderssins, soe hebben wy verordent, dat u gesonden soude wordden die voirs(eyde) affgesette caerte, met oick een witte, ten eynde dat ghy deselve wel doersiet ende visiteert ende daernae ons deselve wederseyndt met de voirs(eyde) supplicatie, ons overschryvende uwe goetduncken alzoewel op ’t uuytgeven ende publiceren der voirs(eyde) caerte als op de distinctie der limiten ende affsettinge van den verwen derselver, soeveel aengaet den lande van Gelre ende Zutphen ende hoere toebehoerten, om, uwe antwoerde gesien, te verordenen op ’t versoeck des suppliants, als wy bevinden sullen te behoeren. (...)