Articulen, daerop die hiemraden van Delfl(an)t besteden willen meester Jacob van Deventer te becaerten die geheele circonferencie ofte rinck vant hiemraetscap van Delflant
1. Eerst sal die voorn(oemde) meester Jacob gehouden wesen te maken een carte upte cleyne voet van alle die polders, die gelegen zijn in denselven rincq en(de) de molens, caden en(de) watertochten van deselve polders up haer mate in dieselve caerte te stellen, elke polder en(de) molens mit haer namen.
2. Voerts sal den voorn(oemde) meester Jacob gehouden wesen te describe(re)n alle lencten en(de) breten van de duynen in denselven rinck gelegen tot in de Mase toe.
3. Noch sal hy gehouden wesen te bemeten den gehelen Maesdyck vant beginsel of bij der Heyde tot in de stede van Schiedamme toe, describerende upte cleyne voet alle die distancien, houfslagen, sluysen, steenen dycken en(de) van de uuyter gorssen buyten denselven dyck gelegen.
4. Voorts sal hy noch gehouden wesen van (de) voorsz(eyde) stede van Schiedam off tot an de zijtwint ofte lantscheydinge toe, ende voorts van de voornoemde zijtwint ofte lantscheydinge tot an den Leytschen dam toe, en(de) van den Leytschen dam voorts tot an de duynen toe, en(de) van de duynen tot in de zee toe, describerende altyts alle notelicken wercken totten voersz(eyde) heemraetscap dienen(de).
5. Voerts sal hy noch gehouden wesen een scheijt te maken binnen den voern(oemden) ring tusschen die acht westamb(ach)ten ende vijff oostamb(ach)ten en(de) voerts daerinne te stellen op haer mate alle wegen en(de) banwateringen int buytenwater gelegen mit haer huelen off bruggen dien(en)de tot ’t voorsz(eyde) hiemraetschap.
6. Voorts sal hy noch gehouden wesen te stellen alle kercken binnen den voorn(oemde) ring gelegen op haer behoerlicke plaetse upte cleyne voet navolgen(de) die proporcie van de groote voet.
7. Ende daerenboven sal den voorn(oemde) meester Jacob in deselve carte rontsom(m)e denselven ring stellen de limiten daer naest om gelegen.
8. Ende hieraf zal de voorsz(eyde) meester Jacob den heemraden afleveren zes carten.
Up dese voerwaerden heeft m(eester) Jacob van Deventer angenomen te maken een caerte van Delflant, daervoren hy geeyst heeft die som(m)e van hondert ponden van XL gr(ooten) het pont. En(de) es vanwegen dyckgrave en(de) heemraden daerop geboden vijffentzeventich dergelike ponden en(de) sal hebben soeveel als nae’t opleveren van(de) voersz(eyde) carten hy bevonden sal werden verdient te hebben, te weten niet meer dan hondert voersz(eyde) ponden, noch min dan vijf en(de) ’t zeventich.
Actum in den Hage ten hyse van Jan Bruynsz. op ten XXVIen aprilis 1539. Dan dese voerwaerden ende articulen heb ick uuyt bevel van de hiemraden een dubbelt gelevert den voorn(oemden) meester Jacob van Deventer ende tselve ondergeteyckent opten dach ende jaer als boven.