Mémoire sur le voiage de Zélande ou sont estés envoyés par monseigneur le duc d'Alve, gouverneur et capitaine general du Pais Bas, les seigneurs marquis de Cetona, Gabrio Cervillon, capitaine Bertholomé et moy1 affin d'aviser quel moyen il y auroit d'asseurer ledit pais et specialement l'isle de Walcheren, pour estre le plus dangereuse de surprinse et la plus importante sy il s'esmouvoit du nouveau guerre entre les François et nous ou bien les Anglois et Hugenots, leurs alliés ou aultres. Faict en mars, le XXIIIIe, 1568. Et party de Bruxelles à cest effect le XVe dudit moys.

(fol. 7v)
Au droict des dunes entre la Vere en ledit pais de Schawe y a un canal nommé le Rompot demonstré par la carte, lequel est navigable avecq grans batteaux par y avoir parfondeur à basse marée de 7, 6, 5 et 4 au moins de braces, mais semble que sans bons pilotes du pais mesmes estant les caps qui sont d'eulx merchés lesquelles sont sur les dunes servant de signaulx ostés, il seroit quasi impossible de pouvoir entrer audit canal avecq nombre des grands batteaux pour cause des bancqs. De l'endroict des dunes susdites cheminant vers le noord le long d'icelles, le long de la marine se treuve toute playe à basse marée en aulcunes lieux de 100, 200, 300 et 400 pas avecq quelques bancqs audevant comme le démonstre la carte, jusques au droict de la cap qui est entre l'église de Renes et la cap quy est plus vers la Vere sur une poincte où se trouve un canal nommée Homaervliet par laquelle entre les bancqs l'on peult entrer avecq grandes hulkes, pour y avoir 5 braces d'eaue, et venir le long des dunes à l'endroict de l'église de Renesse à cent pas près d'icelle et contenant la profondeur aussy le long du pais jusques à Brawershaven et de là en avant vers la Zyppe pardevant Bomene ladite Zippe joindant Duvelant. Audit canal y a à basse marée profondeur du moins de quatre braces et de largeur au moings 100 verges de douze pieds chascune. A haulte marée les plus grands hulkes qui navigent en toute coste y peuvent passer, non touteffois sans fort grand danger sy les vents sont aulcunement grands, car donnant à une costé ou à l'aultre dudit canal, quy n'est assez large pour laverj, seroit pour se perdre, aussy qui l'entrée dudit canal pour la multitude des bancqs est fort hasardeuse et tant que sy la pluspart des pilotes dudit Brawershaven estoint frustrés des caps qui leur servent d'adresse ne sauroient y entrer. Les vents nécessaires pour entrer et conduire par ledit canal sont noordwest et zudwest les plus

(fol. 8r)
grands ordinairement et le plus daungereuse. Le canal et profondeur susdit va jusques à Sainc Jannelant.
Ceulx de Brawershaven n'ont cognoissance du canal nommé le Rompot et disent qu'il n'est point sy commode et navigable que celluy qui vient le long du pais pour auprès de Renesse audit Brewershaven que les uns appellent Helvergaet.
Brewershaven est un bourg assez grand et se y trouveroit d'hommes de deffence pour porter armes environ de 950, batteaulx pour aller à la pescherye 50. D'hommes de deffence que se pourroint trouver par les villes et reste dudit pais y a à Syrixsee environ de 1.800 hommes et par le plat pais 1.500, voire quant tous ceulx qui se meslant de la pescherie sont au logis dedans ladite ville de Syrixsee y a environ de 1.000 maisons et aulx faubourgs où sont les salines environ 400. Les terres labourables dudit pais portent bled, avaine, febves, garence, et de cincq ans il convient qu'elles en reposent l'un. Le nombre des villages est sur la carte.
Pour traicter encores sur le canal nommé Rompot, l'entrée en est aultant plus difficile que les marées de France et d'Escosse se y viennent rencontrer, qui est cause de faire un remollument et tournant dangereux, principallement avecq grans vents, par la multitude aussy des bancqs, et quelquefois à l'embouche dudit canal n'y a tant de parfondeur que les grans vasseaulx y puissent entrer, pour cause que selon les vents la mer croist ou descroit. (...)