Au Roy. Supplie en toute humilité Jhérôme Cock, paintre, résident en vostre ville d'Anvers, qu'il plaise à vostre majesté luy occtroyer et consentir de pouvoir imprimer ou faire imprimer, vendre et distributer par tous voz pays-bas de pardecha la carte du pays et duché de Gheldres (en deffendant et interdisant à tous imprimeurs libraires et aultres quelz concques soit des subiectz de votre majesté ou aultres demourans et fréquentans esdits pays de quelque qualité ou condition quilz soient que durant la terme et temps de dix ans ensuyvans et consécutifs à commencher du jour de la date dudict octroy ilz n'ayent à imprimer ou faire imprimer en vosdits pays n'y ailleurs vendre n'y distribuer ladicte carte de Gheldres n'y aussy limiter) ou faire, n'y faire faire (sic) icelle carte en plus grand ou moindre format n'y pareillement icelle carte aultre part faicte et imitée, vendre n'y permuer en aucune manière. Et ce sur paine tant à ceulx, qui l'auront imprimé, vendu ou permué que à ceulx, qui l'auront apporté ou faict apporter d'aultres lieux de confiscation de ladicte carte et d'amende de vingt et cinq carolus d'or dont moictié sera applicquée à l'exécuteur et l'aultre moictié à vostre majesté, enfaisant audict suppliant expedier acte à ce pertinent. Zusatz: Soit la charte cy joincte avec une aultre blanche et sans couleurs envoyée à ceulx du conseil en Geldres, affin d'avoir leur advis tant sur la publication dicelle que la distinction des limites et couleurs en tant qu'il touche les pays de Geldres et Zutphen et les appartenances diceulx; à Bruxelles le 12 d'aoûst 1563.