Staet inhoudende de articlen van costen overghegheven bij die van den Brouck a° 1573

XVIe. Item als de ghecomiteerde van beede de voornomde watringhen tsamen vergadert waeren ten huuse van Phelips Bruneel, aldaer diversche communicatien nopende de affairen vande voornomde twee watringhen, ghehouden was lecture ende visitacie ghedaen vande monumenten ende zeeker register toebehorendede voornomde watringhe van Zudt over Leye, insghelycx extraicten ghenomen vut (sic) de oude rekeninghen vander wateringhe vanden Broucke, dienende totter vernomde instructie metgaders van zeeker bewysen ende lettraigen die den zelven Phelips vercreghen ende onder hem hadde; - voort ontbooden Me Pieter Pousbusse, die aldaer exibeerde zeeker oude carte by het anderen tijden ghemaect voor die vanden Vrijen inhoudende de gheleghentheyt vanden landauwe ontrent Damme met den cours vande watergheleeden daer inne ligghende, aldaer de zelve ghelast was de zydelinghen ende limitten vander zelve watringhe te overgaene midtgaders notitie te houden van alle de waterganghen legghende bijnen der zelve wateringhe, insghelycx noticie te houden vande circonvosine landen ende waterbeleeden die eenich vrempt water zoude moghen aenbringhen ten laste vande voornomde twee watringhen, al tzelve te noteren in de carte up den cleenen voet ende vulbringhen ten iersten dat hem moghelyc waere, alsdoen te costen ghehadt XX gr. compt over dheltscheede. X gr.
XIXe. Item den XIIIen Novembre 1573 de voornomde vier comisen, tvoornomde overlech ghevisiteert hebbende, oordonneerde de voornomde opposanten over te legghen de bewysen ende letteraigien, indien zy eenighe hadden, dienende tot justificatie van hurlieder vermete metgaders een beworp ofte caerte vande ghedenomeerde hooftwaterganghen, betoghende dat de zelve ghemeene zyn legghende met de watere vanden veste van Damme.
XXe. Item als de ghezwoerne met hurlieder assistenten vande watringhe vanden Broucke metgaders de ghecomiteerde vande watringhe van Zudt-over-Leye present den voornomden Me. Pieter Poerbusse visitatie deden lancst de Maelsche Leye wat vreemde wateren inde zelve Leye haerlier suwatie zyn nemende beghinnende ande steenen wieghe legghende over de voornomden Maelsche Leye up den Ardenburchschen wech daer de zydelinghe vande watringhe vanden Broucke hendende zin ende beede de voornomde watringhen van elcander scheiden, zin voort van daer ghesaemdelyck vervolch ghedaen tot tcasteel van Male ende byden zelven Pourbusse vutghetrocken ende gheteekent up de carte wat watreloopen ofte grachten inde zelve Leye haer suwatie nemende zin en van wat gheweste tzelve vreempt watre comende es tzelve werck ghestatert dien dach aen de steene huuele ofte wieghe legghende over den heerwech voor den casteele van Male, ende aldaer vertert XII s. gr. es. over dheltschede (sic). VI s. gr.
XXIIe. Item den XXIIIIen Marte daer naer volghende als de ghecommiteerde van beede de voornomde watringhen te instructie vanden voornomden Pourbusse hem beleet ende betoech deden ontrent Damme ende de Maelsche Leye vanden watergheleeden van diere als doe te costen ghehat IX s. VI gr., es over de helftscheede. IIII s. IX gr.
XXIIIIe. Item den XXVIen Marte 1573 voor Paessche als Jan van Tilke met de voornomde Pourbusse metgaders Fransois de Louf, als beleeder, breeder vervolch deden vanden waterganghen ende aderen vander wateringhe vanden Broucke, beghinnende achter dhermytaige voor de speiporte deser steede tot den Ooestdyck, suwatie nemende inde hooftwaterganghen deser wateringhe, voort byde zelve vervolch ghedaen tot Male ende beleghertheit ghenomen vande vremde wateringhen, die vallende zin inde veste van Male, ende zo inde Maelsche Leye, vandaer gheghaen naer den Vossestert omme aenschaeu te nemen of eeneghe wateringhen commende van Assenbrouck, t Jacopinesse ofte Ryckevelde haeren loop ende val zyn nemende naer t casteel van Male, aldaer te costen ghehadt III s. II gr., ende XX gr., voor de dachure vanden voornomden beledere compt over de helftscheede. IIs. V. gr.
XXXVe. Item betaelt M. Pieter Pourbusse voor zyne vacatien ende t maken vande voornomde carte up de cleenen voet inhoudende een deel van de gheleghentheyt vanden lande legghende bynnen de wateringhe vanden Broucke met de zydelinghen ende lemitten der zelve watringhe ende anderdeel van partie van lande legghende bynnen der watringhe van Moerkerke Zudt over Leye metgaders de circonvosine landen int ronde van diere gheleghen insghelicx oec ghenoteert alle de hooftwaterganghen, watergheleden ende aderen waer zy beghynnende ende orspronck nemende zin, die eens deels haerlieder beleet ende suwatie nemende zin in de veste van Damme, daer tghemencionneerde greis sluusken inde zoutte vaert ter zeewaert vutte ende een deel dur tghemeene condut ligghende onder de ghentsche Lieve ende zo naer de ghemene sluuse te Brugheers ter zeewaerts vute ; voort genoteert alle de watergheleeden die buten de voornomde lemitten ende zydelinghen vande voornomde twee wateringhe ligghende zin die eenich vrempt water zoude moghen aenbringhen in de Maelsche Leye ende veste vanden casteele van Male ende van wat gheweste tzelve vrempt watre commende es omme daer van ghordineert te zyne alzo de voornomde ghelande goet dincken zal de somme van (...) compt over de helftscheede.